महाविकास आघाडीत मैत्रीपूर्ण लढती नाहीत , चेन्नीथला यांना विश्वास
मुंबई, दि. ३०(एमएमसी न्यूज नेटवर्क) : राज्यात विधानसभा निवडणुकीत जागा वाटपाबाबत महाविकास आघाडीमध्ये कोणताही मतभेद नाही त्यामुळे आमच्यात मैत्रीपूर्ण लढती होणारच नाहीत, असा विश्वास आज काँग्रेसचे महाराष्ट्र प्रभारी रमेश चेन्नीथला यांनी व्यक्त केला आहे. मुंबईत काँग्रेस पक्ष कार्यालय टिळक भवन इथं आयोजित पत्रकार परिषदेत ते आज बोलत होते. यावेळी नेते नाना पटोले आणि वर्षा गायकवाड उपस्थित होते.
आम्ही सर्व पक्षांना समान महत्त्व आणि संधी दिली असल्याचे ते म्हणाले.भ्रष्ट युतीमुळे राज्याची दु:स्थिती झाल्याचं सांगत यावेळी काँग्रेस नेत्यांनी महायुती सरकारवर जोरदार टीका केली. बेरोजगारी, सरकारी नोकऱ्या, राज्यातील बेपत्ता महिला आणि मुली याविषयी आकडेवारीचा दाखला देत याला महायुती सरकार कारणीभूत असल्याचं त्यांनी सांगितलं. राज्यातली विधानसभा निवडणूक महायुती लढवत नसून एकटा भाजप लढवत आहे, असंही रमेश चेन्नीथला यावेळी म्हणाले. दोन्ही प्रादेशिक पक्षांना संपवण्याचा भाजपाचा डाव आहे असा आरोपही त्यांनी केला. नवाब मलिक यांना उमेदवारी दिल्याबद्दलही चेन्नीथला यांनी यावेळी टीका केली.
ML/ SL/ML
30 October 2024
