AI वापरून नकली रेल्वे पास, उच्चशिक्षित दांपत्याला अटक
ठाणे, दि. २९ : AI च्या वापरामुळे अनेक कामे सोपी आणि वेगवान झाली आहेत. मात्र कोणतेही नवीन तंत्र आले की त्याचा गैरवापर होण्याची शक्यताही असते. AI चा गैरवापर करुन कल्याण येथील एका उच्चशिक्षित नोकरदार दांपत्याने एसी लोकलचा नकली पास तयार करुन रेल्वे प्रशासनाची फसवणूक केली आहे. एका दक्ष टीसीच्या सतर्कतेमुळे हा घोटाळा उघडकीस आला आहे. त्यानंतर संबंधितांना अटक करण्यात आली आहे.
अटक करण्यात आलेली महिला गुड़िया ओमकार शर्मा असून ती प्रसिद्ध बँकेत सेल्स मॅनेजर म्हणून काम करते. विशेष म्हणजे, तिचा मासिक पगार जवळपास 1 लाख रुपये इतका असूनही ती अनेक महिन्यांपासून नकली पास वापरून एसी लोकलमध्ये प्रवास करत होती. या संपूर्ण फसवणुकीमागे तिचा पती ओमकार शर्मा असल्याचे उघड झाले आहे, तो इंजिनिअर आहे.
26 नोव्हेंबर रोजी एसी लोकलमध्ये तिकीट तपासणी सुरू असताना, TTI विशाल नवले यांना महिलेने दाखवलेला डिजिटल पास संशयास्पद वाटला. महिलेने हा तिचा सिझन पास युटीएस ॲपमध्ये काढल्याचा दावा केला. परंतु, हा पास प्रत्यक्षात गुगल क्रोम ब्राउझरमध्ये उघडलेला होता.
या पासवर QR कोड नव्हता. कोणताही डिजिटल पास तपासण्यासाठी क्यूआर कोड हा सर्वात महत्त्वाचा भाग असतो, जो या पासमध्ये नव्हता. पास नंबर तपासल्यावर तो ओमकार शर्माच्या नावावर असून त्याची वैधता फेब्रुवारी 2025 मध्येच संपली असल्याचे आढळले. व्हॉट्सॲप डेटा तपासल्यावर हा पास पूर्णपणे नकली असल्याचे स्पष्ट झाले.
डोंबिवली स्टेशनवर महिलेला विचारपूस सुरू झाल्यावर तिने लगेचच नकली पास तिच्या पती ओमकारने तयार केल्याचे कबूल केले. यानंतर ओमकार शर्मालाही ताब्यात घेण्यात आले. त्याने चौकशीदरम्यान कबूल केले की, त्याने हे पास कोडिंग, आर्टिफिशियल इंटेलिजन्स (AI) आणि चॅटजीपीटी सारख्या टूल्सच्या मदतीने तयार केले होते. त्याच्या मोबाईलमधून 10 आणखी पास सापडले, जे त्याने वेगवेगळ्या लोकांना पाठवले होते.
SL/ML/SL
