मुख्य निवडणूक आयुक्तांच्या हेलिकॉप्टरचे इमर्जन्सी लँडिंग
डेहराडून, दि. १६ (एमएमसी न्यूज नेटवर्क) : मुख्य निवडणूक आयुक्त राजीव कुमार यांच्या हेलिकॉप्टरचे उत्तराखंडमधील मुनसियारी येथील रालम येथे आपत्कालीन लँडिंग करण्यात आले आहे. खराब हवामानामुळे हेलिकॉप्टरचे लँडीग करण्यात आल्याची माहिती मिळत आहे. हेलिकॉप्टर मिलमच्या दिशेने जात होते. त्यांच्यासोबत राज्याचे उपमुख्य निवडणूक अधिकारी विजयकुमार जोगदंडे हेही आहेत. निवडणूक आय़ुक्तांसह हेलिकॉप्टरमधील सर्वजण सुखरुप आहेत. उतरल्यानंतर मुख्य निवडणूक आयुक्त आणि त्यांच्यासोबत उपस्थित असलेल्या इतर अधिकाऱ्यांना जवळच्या अतिथीगृहात नेण्यात आले.
मुख्य निवडणूक आयुक्त राजीव कुमार यांनी कालच झारखंड आणि महाराष्ट्रात विधानसभा निवडणुकांची घोषणा केली आहे. राजीव कुमार हे 1984 च्या बॅचचे आयएएस अधिकारी आहेत. 15 मे 2022 रोजी त्यांना मुख्य निवडणूक आयुक्त बनवण्यात आले. राजीव कुमार हे देशाचे 25 वे मुख्य निवडणूक आयुक्त आहेत. ते 18 फेब्रुवारी 2025 पर्यंत हे पद सांभाळतील.
SL/ML/SL
16 Oct. 2024
