या कारणामुळे बदलली हरियाणा विधानसभा निवडणुकीची तारीख

नवी दिल्ली, दि. ३१ (एमएमसी न्यूज नेटवर्क) : निवडणूक आयोगाने हरियाणा विधानसभा निवडणुकीच्या तारखेत बदल केला आहे. 90 जागांसाठी 1 ऑक्टोबर ऐवजी 5 ऑक्टोबरला निवडणूक होणार आहे. याशिवाय 8 ऑक्टोबरला निकाल लागणार आहेत. जम्मू-काश्मीर विधानसभा निवडणुकीचे निकाल 8 ऑक्टोबरला जाहीर करण्याची घोषणाही आयोगाने केली आहे. यापूर्वी दोन्ही राज्यांचे निकाल 4 ऑक्टोबरला लागणार होते.

निवडणूक आयोगाने सांगितले की, राजस्थानच्या अखिल भारतीय बिश्नोई महासभेच्या राष्ट्रीय अध्यक्षांनी आमच्याकडे तारीख बदलण्याची मागणी केली होती. ते म्हणाले की, अनेक पिढ्यांपासून पंजाब, राजस्थान आणि हरियाणातील अनेक कुटुंबे गुरु जंभेश्वरांच्या स्मरणार्थ बिकानेर जिल्ह्यातील ‘असोज’ महिन्याच्या अमावस्येच्या दिवशी वडिलोपार्जित मुकाम गावात वार्षिक उत्सवात सहभागी होतात.यंदा हा सण 2 ऑक्टोबरला आहे. यामुळे सिरसा, फतेहाबाद आणि हिस्सार येथील हजारो बिश्नोई कुटुंब मतदानाच्या दिवशी राजस्थानला रवाना होतील, त्यामुळे ते 1 ऑक्टोबरला मतदान करू शकणार नाहीत.

निवडणूक आयोगाने प्रसिद्ध केलेल्या निवेदनात म्हटले की, मतदारांचा मतदानाचा अधिकार अबाधित ठेवणे आणि शेकडो वर्ष जुन्या परंपरेचा सन्मान करण्यासाठी आम्ही निवडणूक पुढे ढकलत आहोत. बिश्नोई समाजाचे गुरू जांभेश्वर यांच्या स्मृतीप्रित्यर्थ ३०० वर्षांपासून ही परंपरा समाजाकडून जोपासली जात आहे.

हरियाणात विधानसभेच्या ९० जागांसाठी निवडणूक होणार आहे. नुकत्याच झालेल्या लोकसभा निवडणुकीत भाजपाला हरियाणात फटका बसला होता. २०१९ साली त्यांना हरियाणात १० जागा मिळाल्या होत्या. यावेळी त्यांना फक्त पाच जागा जिंकण्यात यश मिळाले. हरियाणामध्ये बिश्नोई समाजाची संख्या बऱ्यापैकी आहे. बिश्नोई समाजाचे मूळ हे शेजारच्या राजस्थान राज्यात असले तरी गेल्या काही वर्षांत अनेकजण हरियाणामध्येही स्थायिक झाले आहेत. त्यामुळे या समाजाची मते सर्वच पक्षांसाठी महत्त्वाची ठरणार आहेत.

SL/ML/SL

31 August 2024