ड्रग्ज तस्कर ललित पाटील याला अखेर चेन्नईतून अटक
मुंबई दि.18 ( एम एमसी न्यूज नेटवर्क) : गेल्या काही दिवसांपासून फरार असलेला ड्रग्ज तस्कर ललित पाटील याला अखेर मुंबई पोलिसांच्या गुन्हे शाखेने चेन्नईतून अटक केली आहे. 2 ऑक्टोबर 2023 रोजी ललित पाटील हा पुण्यातील ससून रुग्णालयातून पळून गेला होता. त्याच्या शोधासाठी दहा पथकं तयार करण्यात आली होती.
ललित पाटील हा चेन्नई येथे लपून बसल्याची माहिती मुंबई पोलिसांच्या गुन्हे अन्वेषण विभागाला मिळाली होती. या पथकाने चेन्नई गाठून सापळा रचला आणि ललित पाटीलच्या मुसक्या आवळल्या. मुंबई पोलिसांनीच ललित पाटीलचा नाशिकमधला ड्रग्स कारखाना उद्ध्वस्त केला होता.ललित पाटील याला आता मुंबईत आणलं गेलं असून लवकरच कोर्टात सादर करण्यात येणार आहे.
ललित पाटील हा पोलिसांच्या हाती लागल्याने ड्रग्सप्रकरणातील अनेक बड्या लोकांची नावे बाहेर येण्याची शक्यता आहे. दरम्यान, आठवडाभरापूर्वी पोलिसांनी ललित पाटीलचा भाऊ भूषण पाटील याला अटक केली होती. तसेच त्याला तपासासाठी नाशिकला आणण्यात आले होते. नाशिकच्या उपनगर परिसरात असलेल्या भूषण पाटील याच्या घरी पुणे पोलिसांनी तपास केला. शिंदे गावात ज्या ठिकाणी कारवाई करण्यात आली, त्या ड्रग्स कारखान्यावर देखील भूषणला तपासासाठी नेण्यात आले होते. ही चौकशी पूर्ण करून पुणे पोलिसांचे पथक भूषण पाटीलला घेऊन रवाना झाले होते.
SL/KA/SL
18 Oct. 2023
