सीएनजीचा दर आजपासून वाढला, मुंबई, उपनगरात महागाई वाढण्याची शक्यता

महानगर गॅस लिमिटेड (एमजीएल)ने सीएनजी आणि पीएनजीच्या किमतीत वाढ जाहीर केली आहे. ही दरवाढ आज बुधवारपासून लागू होणार आहे. नवीन दरानुसार, सीएनजीची किंमत प्रतिकिलो १.५० रुपयांनी वाढून ती ७९.५० रुपये प्रतिकिलो झाली आहे. घरगुती वापरासाठी वापरल्या जाणाऱ्या पाइप नैसर्गिक वायू (पीएनजी)ची किंमत १ रुपयाने वाढून ती ४९ रुपये प्रती एससीएम झाली आहे.
ही दरवाढ मुंबईसह उपनगरांमध्ये केली गेली आहे. त्यामुळे लाखो ग्राहकांना त्याचे परिणाम भोगावे लागणार आहेत. विशेषतः सीएनजीवर चालणाऱ्या टॅक्सी, रिक्षा आणि इतर वाहनचालकांना याचा थेट फटका बसणार आहे.