नागपूर सह दुय्यम निबंधक कपले निलंबित, महसूलमंत्र्यांच्या छाप्यात सापडली होती रोकड
मुंबई दि. ९ : महसूल मंत्री चंद्रशेखर बावनकुळे यांनी नागपुरातील सह दुय्यम निबंधक कार्यालयाला दिलेल्या अचानक भेटीदरम्यान टेबलच्या ड्रॉवरमध्ये पाच हजारांची रोकड आढळून आल्याने सह दुय्यम निबंधक, वर्ग-२ अ.तु.कपले यांना गुरुवारी निलंबित करण्यात आले. महसूलमंत्र्यांच्या या छाप्यामुळे संपूर्ण महाराष्ट्रात खळबळ उडाली होती.
महसूल मंत्री चंद्रशेखर बावनकुळे यांनी ६ ऑक्टोबर २०२५ रोजी नागपूर शहर क्रमांक ४ येथील सह दुय्यम निबंधक, वर्ग-२, यांच्या कार्यालयाला प्रभारी सह जिल्हा निबंधकांसोबत अकस्मात भेट दिली होती. त्याचदरम्यान प्रसारमाध्यमांशी चर्चा करत असतानाच, बावनकुळे यांनी कपले यांच्या टेबलाचा ड्रॉवर उघडून पाहिला असता त्यात ५,००० रुपयांची रक्कम आढळून आली.
पोलिसांना पाचारण, चौकशीचे आदेश
रोकड सापडताच महसूल मंत्र्यांनी कपले यांना याबाबत विचारणा केली. समाधानकारक उत्तर न मिळाल्याने तात्काळ पोलीस यंत्रणेला पाचारण केले. पोलिसांनी रक्कम ताब्यात घेऊन पंचासमक्ष कपले यांचे बयान नोंदवले. तसेच, त्या दिवसातील दस्त नोंदणी झालेल्या पक्षकारांचे जबाब घेण्यासाठी संबंधित कागदपत्रांच्या प्रतीही पोलिसांनी ताब्यात घेतल्या आहेत. या संपूर्ण प्रकरणाची सखोल चौकशी करून अहवाल सादर करण्याचे निर्देश महसूलमंत्र्यांनी पोलीस विभागाला दिले होते.
ड्रॉवरमध्ये रक्कम सापडल्याने कपले यांनी महाराष्ट्र नागरी सेवा (वर्तणूक) नियम, १९७९ च्या नियम ३ चा भंग केल्याचा ठपका ठेवण्यात आला आहे. त्यामुळे, महाराष्ट्र नागरी सेवा (शिस्त व अपील) नियम, १९७९ मधील तरतुदींनुसार त्यांना ९ ऑक्टोबर २०२५ पासून पुढील आदेशापर्यंत निलंबित करण्यात आले आहे.ML/ML/MS
