H1B व्हिसा मुलाखती रद्द झाल्याने परराष्ट्र मंत्रायल चिंतेत
नवी दिल्ली, दि. 26 : भारताने अमेरिकेकडे मोठ्या संख्येने भारतीय अर्जदारांच्या H1B व्हिसा मुलाखती अचानक रद्द झाल्याबाबत गंभीर चिंता व्यक्त केली आहे. परराष्ट्र मंत्रालयाने शुक्रवारी सांगितले की, या विषयावर दोन्ही देशांमध्ये चर्चा सुरू असून भारतीय नागरिकांच्या अडचणींबाबत अमेरिकेला कळविण्यात आले आहे.
मध्य डिसेंबरपासून नियोजित हजारो H1B व्हिसा अर्जदारांच्या मुलाखती अचानक पुढे ढकलण्यात आल्या आहेत. अमेरिकन स्थलांतर विभागाने अर्जदारांच्या सोशल मीडिया पोस्ट्स व ऑनलाइन प्रोफाइल्सची तपासणी करण्यासाठी हा निर्णय घेतल्याचे समजते. काही अर्जदारांना ई-मेलद्वारे कळविण्यात आले असून त्यांच्या मुलाखती मे महिन्यापर्यंत पुढे ढकलण्यात आल्या आहेत. यामुळे आयटी क्षेत्रातील व्यावसायिक आणि अमेरिकेत काम करण्याची संधी शोधणाऱ्या भारतीयांमध्ये मोठी अनिश्चितता निर्माण झाली आहे.
H1B व्हिसा हा अमेरिकेत विशेष कौशल्य असलेल्या परदेशी व्यावसायिकांना दिला जाणारा कामगार व्हिसा आहे. भारतीय आयटी क्षेत्रातील कर्मचाऱ्यांचा यात मोठा वाटा आहे. दरवर्षी हजारो भारतीय व्यावसायिक या व्हिसासाठी अर्ज करतात. अमेरिकन कंपन्यांना तंत्रज्ञान, अभियांत्रिकी आणि संशोधन क्षेत्रात कुशल मनुष्यबळ मिळवण्यासाठी H1B व्हिसा महत्त्वाचा ठरतो.
मात्र गेल्या काही वर्षांत अमेरिकेने या व्हिसावर अधिक काटेकोर नियम लागू केले आहेत. अर्जदारांच्या शैक्षणिक पात्रतेसोबतच त्यांच्या सोशल मीडिया व ऑनलाइन उपस्थितीची तपासणी केली जाते. यामुळे प्रक्रिया अधिक वेळखाऊ झाली आहे.
- मुलाखती पुढे ढकलल्यामुळे अनेक भारतीय व्यावसायिकांचे नियोजित रोजगार व प्रकल्प धोक्यात आले आहेत.
- कंपन्यांच्या कामकाजावर परिणाम होण्याची शक्यता व्यक्त केली जात आहे.
- भारत सरकारने अमेरिकेला या निर्णयामुळे भारतीय नागरिकांना होणाऱ्या गैरसोयीबाबत स्पष्टपणे कळवले आहे.
या विषयावर पुढील काही दिवसांत भारत-अमेरिका चर्चेत अधिक स्पष्टता येण्याची अपेक्षा आहे. या घडामोडीमुळे H1B व्हिसा प्रक्रियेतील पारदर्शकता आणि वेग याबाबत प्रश्नचिन्ह निर्माण झाले आहे.
