बीड – परभणी हत्या, हिंसाचार प्रकरणांची न्यायालयीन चौकशी जाहीर…
नागपूर, दि. 20 (एमएमसी न्यूज नेटवर्क) :बीड आणि परभणी येथील घटनांची निवृत्त न्यायाधीशांमार्फत न्यायालयीन चौकशी केली जाईल, मृत आंदोलक आरोपी सोमनाथ सूर्यवंशी आणि बीड मधील हत्या झालेल्या सरपंच देशमुख यांच्या कुटुंबियांना प्रत्येकी दहा लाखांची मदत केली जाईल अशी घोषणा मुख्यमंत्री देवेंद्र फडणवीस यांनी आज केली.
परभणी प्रकरणी अतिरिक्त बळाचा वापर करणाऱ्या पोलीस निरीक्षक अशोक घोडबांड यांना निलंबित करून त्यांची चौकशी केली जाईल अशा घोषणाही मुख्यमंत्री फडणवीस यांनी विधानसभेत केली. या प्रकरणी विरोधकांनी उपस्थित केलेल्या अल्पकालीन चर्चेला ते उत्तर देत होते.
बीड प्रकरणातील हत्येप्रकरणी न्यायालयीन चौकशी जाहीर करतानाच मृत सरपंच देशमुख यांच्या कुटुंबियांना दहा लाखांची मदत मुख्यमंत्री देवेंद्र फडणवीस यांनी जाहीर केली. या दोन्ही चौकशीचा अहवाल तीन ते सहा महिन्यात घेतला जाईल. बीड जिल्ह्यातील वाळू माफिया, भू माफिया आणि खंडणीखोर यांच्या विरुध्द मोक्का अंतर्गत कारवाईची मोहीम आखली जाईल अशी घोषणाही मुख्यमंत्री फडणवीस यांनी यावेळी केली.
याप्रकरणी जो मास्टर माईंड असेल तो कोणाचा ही हस्तक असेल , कोणा सोबत ही त्याचे फोटो असतील तरी त्याच्यावर कडक कारवाई केली जाईल. वाल्मीक कराड याच्यावर अन्य एका प्रकरणी पुरावे सापडले आहेत त्याला अटक केली जाईल, अशा सर्व प्रकारच्या संघटित गुन्ह्यांसाठी मोकका अंतर्गत कारवाई केली जाईल अशी ग्वाही देखील त्यांनी यावेळी दिली.
परभणी इथे आंदोलन दरम्यान शांतता प्रस्थापित करण्यासाठी प्रयत्न करणाऱ्या विजयकुमार वाकोडे यांच्या मृत्यू प्रकरणी त्यांच्या कुटुंबीयांना देखील पाच लाख रुपयांची मदत मुख्यमंत्र्यांनी जाहीर केली. मुख्यमंत्र्यांनी दिलेल्या उत्तराने समाधान न झाल्याने निषेध करत विरोधी सदस्यांनी सभात्याग केला.
ML/ML/PGB 20 Dec 2024
