शिरीन पाठारे मानाच्या पुरस्काराने सन्मानित
मुंबई दि २८ (एमएमसी न्यूज नेटवर्क) : एअर इंडीयामध्ये ३१ वर्षांपासून विमान वाहतूक सुरक्षा विषयक महत्त्वाची जबाबदारी पार पाडणारे शिरिन शरद पाठारे यांना ब्युरो ऑफ सिव्हिल एव्हिएशन सिक्युरिटी (BCAS) कडून महासंचालक बीसीएएस कमेंडेशन नॅशनल सर्टिफिकेशन हा मानाचा पुरस्कार जाहीर झाला आहे. गुणवत्तापूर्ण सुरक्षा मानकांची अंमलबजावणी आणि सुरक्षा प्रशिक्षण कार्यातील गुणवत्तापूर्ण योगदान यासाठी पाठारे यांची या पुरस्कारासाठी निवड करण्यात आली आहे. असा पुरस्कार मिळवणारे ते यावर्षीचे एकमेव मराठी अधिकारी आहेत. पाठारे हे मार्च २०२१ पासून श्रीनगर आंतरराष्ट्रीय विमानतळावर सुरक्षा प्रमुख म्हणून जोखमीची जबाबदारी पार पाडत आहेत.
भारतीय सैन्य दलाप्रमाणेच देशाच्या सुरक्षा व्यवस्थेमध्ये महत्त्वपूर्ण भूमिका बजावणाऱ्या BCAS मध्ये शिरिन पाठारे हे गेली ३१ वर्ष जोखमीच्या जबाबदाऱ्या पार पाडत आहेत. BCAS चे निरीक्षक आणि परीक्षक म्हणून कार्यरत असलेल्या पाठारे एक निष्णात एव्हिएशन सिक्युरिटी मॅनेजमेंट स्ट्रॅटेजिस्ट म्हणूनही सिव्हिल एव्हिएशन क्षेत्रात परिचित आहेत.श्रीनगरमध्ये महत्त्वाची जबाबदारी पार पाडत असतानाच ते तेथील ड्रॉपगेट या अतिसंवेदनशील गेटवर तैनात CRPF जवानांना प्रशिक्षण देण्याचे कामही करत आहेत.
हवाई वाहतूकीचा संबंध नागरी वाहतूकीशी येतो तसाच तो लष्करी वाहतूकीशी येतो. पाठारे यांनी काबुल, अफगाणिस्तान आणि श्रीनगर -J&K सारख्या जगातील अतिसंवेदनशील विमानतळांसह अनेक देशांतर्गत आणि आंतरराष्ट्रीय सुरक्षा व्यवस्थापनाच्या जबाबदाऱ्या यशस्वीपणे पूर्ण केल्या आहेत.विमान वाहतूकतील सुरक्षाविषयक संभाव्य धोके टाळण्यासाठी त्यांनी अनेक सुरक्षा ऑडीट्स, तपासण्या आणि जागरुकता कार्यक्रमांचे आयोजन केले आहे.
कार्गो आणि हाय प्रोफाईल व्हीआयपींच्या सुरक्षेवर देखरेख ठेवण्याचाही त्यांना दीर्घ अनुभव आहे. शिरीन पाठारे यांनी देशाच्या विमान वाहतूक सुरक्षा विषयक श्रेत्रात दिलेल्या योगदानामुळे हे क्षेत्र अधिक गुणवत्तापूर्ण आणि अत्याधुनिक होण्यास मदत झाली आहे. पाठारे यांना हा पुरस्कार नुकताच स्वातंत्र्यदिनी जाहीर करण्यात आला. पुरस्कार वितरण कार्यक्रमनंतर आयोजित करण्यात येणार आहे.
BCAS Officers and Officials आणि Other agencies officers and Officials या दोन विभागात BCAS वर्षी हे पुरस्कार प्रदान करते. Disc आणि Certificate दोन प्रकारात हे पुरस्कार दिले जाता. विमान वाहतूक सुरक्षा क्षेत्रातील हे अत्यंत मानाचे पुरस्कार आहेत.
ML/KA/SL
28 Aug 2023
