मालदीव राष्ट्रपतींवर राज्यमंत्र्यांकडून काळी जादू करण्याचा प्रयत्न
माले, दि. २७ (एमएमसी न्यूज नेटवर्क) : मालदीवच्या पर्यावरण राज्यमंत्री फातिमाथ शमानाझ यांना राष्ट्राध्यक्ष मोहम्मद मुइज्जू यांच्यावर काळी जादू केल्याच्या आरोपाखाली अटक करण्यात आली आहे. स्पॅनिश न्यूज एजन्सी ईएफईने दिलेल्या माहितीनुसार, फातिमाथ व्यतिरिक्त आणखी दोघांना अटक करण्यात आली आहे. न्यायालयाने सर्वांना सात दिवसांची पोलिस कोठडी सुनावली आहे. मात्र, या प्रकरणी मालदीव सरकारकडून अद्याप कोणतेही वक्तव्य करण्यात आलेले नाही. यापूर्वी पोलिसांनी फातिमाथ यांच्या घराची झडती घेतली होती. या काळात तेथून काळ्या जादूशी संबंधित अनेक वस्तू जप्त करण्यात आल्या. फातिमाथ या राष्ट्रपती कार्यालयात काम करणारे मंत्री ॲडम रमीझ यांच्या पत्नी आहेत.
याआधी फातिमाथ अध्यक्ष मुइज्जू यांच्यासह मालेच्या सिटी कौन्सिलच्या सदस्य होत्या. तेव्हा मुइज्जू राजधानी मालेचे महापौर होते. गेल्या वर्षी अध्यक्ष झाल्यानंतर फातिमाथ यांनीही परिषदेचा राजीनामा दिला होता. त्यानंतर त्या राष्ट्रपतींचे अधिकृत निवासस्थान असलेल्या मुलिआजच्या राज्यमंत्री झाल्या. नंतर त्यांची पर्यावरण मंत्रालयात बदली झाली.
मालदीवमध्ये काळी जादू फंदिता किंवा सिहुरू म्हणून ओळखली जाते. इस्लामिक कायद्यात याला गंभीर गुन्हा म्हटले गेले आहे. तथापि, असे असूनही, मालदीवमध्ये मोठ्या संख्येने लोक काळी जादू करतात. गेल्या महिन्यात पोलिसांनी मुइज्जूंच्या पक्षाच्या नेत्यावर काळी जादू केल्याबद्दल एका 60 वर्षीय व्यक्तीला अटक केली होती. 2013 च्या राष्ट्रपती निवडणुकीचे निकाल उलथवून टाकण्यासाठीही काळ्या जादूचा वापर करण्यात आला होता. यासाठी मतदान केंद्रावर शापित नारळ आणि काळी जादूची बाहुली ठेवण्यात आली होती.
SL/ML/SL
27 June 2024
