पाकला पाणी देण्यास अफगाणिस्तानचाही नकार
काबुल, दि. २४ : अफगाणिस्तानने पाकिस्तानकडे जाणाऱ्या पाण्याचा प्रवाह रोखण्याचा निर्णय घेतला आहे. अफगाणिस्तानच्या माहिती मंत्रालयाने नुकतीच घोषणा केली की तालिबानचे सर्वोच्च नेता मौलवी हिबतुल्लाह अखुंदजादा यांनी कुनार नदीवर धरण बांधण्याचे आदेश दिले आहेत. या निर्णयामुळे पाकिस्तानला अफगाणिस्तानमधून मिळणाऱ्या पाण्याचा पुरवठा थांबू शकतो, ज्याचा मोठा परिणाम पाकिस्तानच्या शेती आणि जलसंपत्ती व्यवस्थापनावर होऊ शकतो.
कुनार नदी ही अफगाणिस्तानमधून वाहणारी एक महत्त्वाची नदी आहे, जी पुढे जाऊन पाकिस्तानमध्ये प्रवेश करते. या नदीवर धरण बांधल्यास पाकिस्तानच्या अनेक भागांमध्ये जलटंचाई निर्माण होण्याची शक्यता आहे. भारताने यापूर्वी सिंधू जलवाटप करार स्थगित करून पाकिस्तानवर दबाव टाकण्याचा प्रयत्न केला होता. आता अफगाणिस्ताननेही अशाच प्रकारे जलनियंत्रणाचा वापर करत पाकिस्तानला उत्तर देण्याची तयारी दर्शवली आहे.
या निर्णयामागे अफगाणिस्तानचा राजकीय आणि सामरिक दृष्टिकोन स्पष्टपणे दिसून येतो. तालिबान सरकारने देशाच्या जलसंपत्तीचा वापर स्वतःच्या हितासाठी करण्याचा निर्णय घेतला असून, पाकिस्तानशी असलेल्या तणावपूर्ण संबंधांच्या पार्श्वभूमीवर हा निर्णय घेतल्याचे मानले जात आहे. अफगाणिस्तानमधील पाणी आणि ऊर्जा मंत्रालय या प्रकल्पासाठी तांत्रिक तयारी करत असून, लवकरच बांधकाम सुरू होण्याची शक्यता आहे.
या घडामोडीमुळे दक्षिण आशियातील जलराजकारण अधिक गुंतागुंतीचे होण्याची शक्यता आहे. पाकिस्तानला भारत आणि अफगाणिस्तानकडून मिळणाऱ्या पाण्यावर मोठ्या प्रमाणात अवलंबून राहावे लागते. त्यामुळे अशा निर्णयांचा थेट परिणाम पाकिस्तानच्या अंतर्गत सुरक्षेवर आणि अन्नधान्य उत्पादनावर होऊ शकतो.
अफगाणिस्तानच्या या पावलामुळे पाकिस्तानला जलसंपत्तीच्या बाबतीत नव्याने रणनीती आखावी लागणार आहे. या पार्श्वभूमीवर आंतरराष्ट्रीय स्तरावरही जलवाटपाच्या मुद्द्यावर चर्चा होण्याची शक्यता आहे. Afghanistan also refuses to provide water to Pakistan
SL/Ml/SL
