वारीबद्दल वादग्रस्त वक्तव्यानंतर अबू आझमींनी मागितली माफी
मुंबई, दि. २४ : समाजवादी पक्षाचे आमदार अबू आझमी यांनी पंढरपूरच्या वारीबाबत केलेल्या वादग्रस्त वक्तव्यावर अखेर माफी मागितली आहे. त्यांनी स्पष्ट केलं की, त्यांच्या विधानाचा हेतू कोणाच्याही धार्मिक भावना दुखावण्याचा नव्हता. जर त्यांच्या शब्दांमुळे वारकरी समाजाच्या भावना दुखावल्या असतील, तर त्यांनी “मी माझे शब्द पूर्णपणे मागे घेतो आणि सर्वांची माफी मागतो” असं जाहीरपणे म्हटलं.
त्यांनी एक्स (पूर्वीचं ट्विटर) वर पोस्ट करत सांगितलं की, त्यांच्या विधानाचा संदर्भ मुस्लिम समाजावरील भेदभावाकडे लक्ष वेधण्याचा होता, आणि वारीची तुलना करण्याचा हेतू नव्हता. त्यांनी वारी परंपरेचा आदर व्यक्त करत, ती महाराष्ट्राच्या समृद्ध सांस्कृतिक वारशाचा भाग असल्याचंही नमूद केलं.
ही प्रतिक्रिया त्यांच्या सोलापूरमधील एका वक्तव्यानंतर आली, ज्यात त्यांनी पालखीमुळे रस्ते जाम होतात, पण मुस्लिम समाजाने कधी तक्रार केली नाही, असं विधान केलं होतं. त्यावरून राज्यभरातून तीव्र प्रतिक्रिया उमटल्या होत्या.
