सुकन्या समृद्धी योजनेच्या लाभार्थ्यांसाठी सरकारकडून मोठी घोषणा

नवी दिल्ली, दि. ३० (एमएमसी न्यूज नेटवर्क) : केंद्र सरकारने देशातील जनतेला मोठं गिफ्ट दिलं आहे. नवीन वर्षाच्या आधी आज सरकारने जानेवारी-मार्च 2024 तिमाहीसाठी सुकन्या समृद्धी योजना (Sukanya Samriddhi Yojana) 3 वर्षांच्या मुदत ठेवीसारख्या काही लहान बचत योजनांचे व्याजदर वाढवले आहेत. सुकन्या समृद्धी योजना आणि तीन वर्षांच्या मुदत ठेव योजनेवरील व्याजात किरकोळ वाढ करण्यात आली आहे. तर अनेक लहान बचत योजनांचे व्याजदर कायम ठेवण्यात आले आहेत अशी माहिती एका अधिसूचनेत केंद्रीय अर्थ मंत्रालयाने दिली आहे. केंद्र सरकारने सुकन्या समृद्धी योजनेचा व्याजदर 8.2 टक्के केला आहे. तर तीन वर्षांच्या मुदत ठेवीचा दर 7.1 टक्के केला आहे. यापूर्वी सुकन्या समृद्धी योजनेचे व्याज 8 टक्के आणि तीन वर्षांच्या टीडीचे व्याज 7.1 टक्के होते. पब्लिक प्रोव्हिडंट फंड (PPF) च्या व्याजात गेल्या तीन वर्षांपासून कोणताही बदल झालेला नाही.

पोस्ट ऑफिस बचत खात्यावर 4 टक्के व्याज, एक वर्षाच्या ठेवीचा व्याज दर 6.9 टक्के, 2 वर्षांच्या ठेवीचा व्याजदर 7.0 टक्के, 3 वर्षांच्या ठेवींवर 7.1 टक्के व्याजदर, 5 वर्षांच्या मुदत ठेवीवर 7.5 टक्के व्याजदर, 5 वर्षांच्या आरडी योजनेवर 6.7 टक्के व्याज, राष्ट्रीय बचत प्रमाणपत्र(NSC) व्याज 7.7 टक्के, किसान विकास पत्र व्याज 7.5 टक्के, सार्वजनिक भविष्य निर्वाह निधी (PPF) व्याज 7.1 टक्के, सुकन्या समृद्धी खात्यावर (SSY) व्याज 8.2 टक्के व्याजदर, ज्येष्ठ नागरिक बचत योजना (SCSSY) व्याज 8.2 टक्के, मासिक उत्पन्न खात्यावर 7.4 टक्के व्याजदर जानेवारी-मार्च 2024 साठी देण्यात आले आहेत.

काय आहे योजना?

सुकन्या समृद्धी योजना ही केंद्र सरकारची एक छोटी बचत योजना आहे. यात गुंतवणूक करायची असल्यास पोस्ट ऑफिस किंवा बँकेत अकाऊंट ओपन करुन करु शकता. ही योजना मुलांच्या भविष्यासाठी पैशांची बचत करण्यासाठी सुरु करण्यात आली. या योजनेत गुंतवणूक केल्यानंतर मुलीच्या 21 वर्षानंतर किंवा मुलीच्या लग्नावेळी मॅच्योर होते. सुकन्या समृद्धी योजना ही बेटी बचाओ-बेटी पढ़ाओ स्कीम अंतर्गत लाँच करण्यात आली. तुमच्या मुलीचे वय 10 वर्षे किंवा त्याहून कमी असले तर तुम्ही तिच्या नावाने SSY अकाऊंट खोलू शकता. तसेच एकहून अधिक मुली असल्यास अधिक खातीही खोलू शकता.

SL/KA/SL

30 Dec. 2023