डोळ्यांवर पट्टी बांधून बुद्धीबळपट मांडत १० वर्षीय मुलीने केला विक्रम
मुंबई, दि. २७ (एमएमसी न्यूज नेटवर्क) : मलेशियातील अवघ्या १० वर्षांच्या पुनितमलार राजशेकर या मुलीने डोळ्यांवर पट्टी बांधून बुद्धिबळ खेळाच्या पटाची मांडणी करून विश्वविक्रम केला आहे. तिने ४५.७२ सेकंदात बुद्धिबळाच्या सोगट्यांची मांडणी करून विश्वविक्रम केला आहे. या उल्लेखनीय कामगिरीबद्दल तिची गिनीज वर्ल्ड रेकॉर्डमध्ये नोंद झाली आहे. पुनितमलारने तिच्या शाळेत बुद्धिबळ खेळातील हे अनोखे कौशल्य सादर करून दाखवले आहे. हे अनोखे कौशल्य दाखवताना शाळेत पालक, शिक्षक आणि शाळा व्यवस्थापन साक्षीदार म्हणून उपस्थित होते, असे सांगण्यात येत आहे.
गिनीज वर्ल्ड रेकॉर्डशी बोलताना पुनितमलार राजशेकर म्हणाली, “माझे बाबा माझे प्रशिक्षक आहेत आणि आम्ही जवळजवळ दररोज एकत्र बुद्धिबळाचा खेळ खेळतो.”
पुनितमलारला गणित विषय आवडतो. तसेच भविष्यात तिला शास्त्रज्ञ बनण्याची इच्छा आहे. तसेच तिने अनेक शालेय स्पर्धांमध्येदेखील भाग घेतला आहे आणि आता तिने गिनीज वर्ल्ड रेकॉर्डमध्ये आपल्या कौशल्याने नाव कोरले आहे आणि विश्वविक्रम केला आहे. तसेच १० वर्षांच्या मुलीच्या अनोख्या कौशल्याचे सर्व स्तरातून कौतुक होत आहे आणि सोशल मीडियावर मुलीच्या या कामगिरीची प्रशंसा केली जात आहे.
ML/KA/SL
27 Sept. 2023
