SCO परिषदेत पहलगाम हल्ल्याचा एकमुखाने निषेध
तिआंजिन, चीन, दि. १ : येथे पार पडलेल्या २०२५ च्या शांघाय सहकार्य संघटना (SCO) शिखर परिषदेत भारताने दहशतवादाविरोधात मोठा राजनैतिक विजय मिळवला. जम्मू-काश्मीरमधील पहलगाम येथे २२ एप्रिल रोजी झालेल्या भीषण दहशतवादी हल्ल्याचा सर्व सदस्य देशांनी एकमुखाने निषेध केला आणि दहशतवाद्यांना कठोर शिक्षा देण्याची गरज व्यक्त केली. पाकिस्तानचे पंतप्रधान शहबाज शरीफ हे परिषदेत उपस्थित असताना हा निषेध करण्यात आला, ज्यामुळे पाकिस्तानवर राजनैतिक दबाव वाढला आहे. भारताने अप्रत्यक्षपणे पाकिस्तानकडून होणाऱ्या सीमापार दहशतवादी कारवायांचा मुद्दा उपस्थित केला
पंतप्रधान नरेंद्र मोदी यांनी परिषदेत भाषण करताना दहशतवादाला “मानवतेसाठी मोठा धोका” असे संबोधले. त्यांनी स्पष्टपणे सांगितले की, दहशतवाद कोणत्याही देशाच्या सीमांचा आदर करत नाही आणि त्याविरोधात एकत्रित कारवाई करणे अत्यावश्यक आहे. भारताने “ऑपरेशन सिंदूर” अंतर्गत सीमापार दहशतवादी तळांवर कारवाई करत कठोर पावले उचलली आहेत.
रशिया, चीन, कझाकिस्तान, उझबेकिस्तान, आणि इतर सदस्य देशांनी पहलगाम हल्ल्याचा तीव्र निषेध केला. संयुक्त निवेदनात म्हटले आहे की, “दहशतवाद्यांना, त्यांच्या समर्थकांना आणि योजनाकारांना न्यायाच्या कठोर चौकटीत आणणे आवश्यक आहे.” दहशतवादाविरोधात दुहेरी भूमिका असणे स्वीकारले जाणार नाही, असेही स्पष्ट करण्यात आले.
SL/ML/SL
