उत्तर कोरियाच्या राष्ट्राध्यक्षांच्या या निर्णयांमुळे जगासमोर मोठे संकट
प्योंगयांग, दि. १० : उत्तर कोरियाचे अध्यक्ष किम जोंग उन यांनी देशात रासायनिक शस्त्रांची निर्मिती सुरू करण्याचा निर्णय घेतल्यामुळे जागतिक स्तरावर मोठा गोंधळ निर्माण झाला आहे. या निर्णयाचा उद्देश राष्ट्राची युद्धसज्जता वाढवण्याचा असल्याचे सांगितले जात असले, तरी यामुळे आंतरराष्ट्रीय शांततेस गंभीर धोका निर्माण होतो. उत्तर कोरियातील लॅबमध्ये घातक रसायनांवर संशोधन सुरू असून, यात सायनाईड, फॉस्जीन, सरीन आणि व्हिएक्स यांसारख्या प्राणघातक घटकांचा समावेश आहे. अंदाजानुसार देशाकडे सध्या 2500 ते 5000 टन रासायनिक शस्त्रांचे भांडार असल्याचे विश्लेषकांचे म्हणणे आहे. या शस्त्रांचा वापर युद्धाच्या मैदानात झाला, तर हजारो लोकांचा मृत्यू होण्याची शक्यता व्यक्त केली जात आहे.
उत्तर आणि दक्षिण कोरियामधील दीर्घकालीन तणाव लक्षात घेतल्यास, या नव्या शस्त्रांचा वापर दक्षिण कोरियावर संभाव्य हल्ला करण्यासाठी होऊ शकतो. याआधी उत्तर कोरियाने रासायनिक शस्त्रांनी सज्ज बॅलेस्टिक मिसाईल्सचे परीक्षण केल्याचे अहवालात नमूद आहे, जे त्यांच्या आक्रमक धोरणाचे संकेत देतात. या गोष्टींमुळे अमेरिका, जपान, युरोपियन देश आणि संयुक्त राष्ट्रसंघाने चिंता व्यक्त केली आहे. संयुक्त राष्ट्रांनी यापूर्वीच उत्तर कोरियावर अण्वस्त्र आणि रासायनिक शस्त्रांच्या बाबतीत निर्बंध लादले होते, पण हा देश वारंवार ते धुडकावत युद्धसज्जतेची तयारी करत असल्याचे दिसते.
या परिस्थितीत, उत्तर कोरियाचे पाऊल केवळ त्यांच्या अंतर्गत धोरणाचा भाग नसून, आंतरराष्ट्रीय राजकारणात तणाव निर्माण करणारा घटक आहे. जर हे संकट नियंत्रणात आले नाही, तर भविष्यात आंतरराष्ट्रीय संघर्ष, मानवी हानी आणि राजनैतिक अस्थिरतेच्या मोठ्या लाटेला जग सामोरे जावे लागेल. जगभरातील प्रमुख राष्ट्रांना एकत्र येऊन उत्तर कोरियावर दबाव टाकण्याची गरज आहे, जेणेकरून अशा घातक शस्त्रनिर्मितीवर अंकुश ठेवता येईल.
SL/ML/SL
