राजकुमार रावचा ‘भूल चूक माफ’ आता थेट OTT वर

राजकुमार राव आणि वामिका गब्बी यांच्या ‘भूल चूक माफ’ या चित्रपटाचे प्रदर्शन पुढे ढकलण्यात आले आहे. एवढेच नाही तर हा चित्रपट आधी थिएटरमध्ये प्रदर्शित होणार होता, परंतु भारत आणि पाकिस्तानमधील सध्याच्या तणावपूर्ण परिस्थिती लक्षात घेता आता तो ओटीटी प्लॅटफॉर्मवर प्रदर्शित करण्याचा निर्णय घेण्यात आला आहे. आता हा चित्रपट १६ मे रोजी प्राइम व्हिडिओवर प्रदर्शित होईल. यासोबतच केसरी वीर या चित्रपटाची रिलीज डेटही पुढे ढकलण्यात आली आहे.

राजकुमार राव आणि वामिका गब्बी यांनी त्यांच्या ‘भूल चुक माफ’ चित्रपटाच्या प्रदर्शनाची तारीख पुढे ढकलल्याची माहिती सोशल मीडियावरून शेअर केली आहे. ते म्हणाले की, अलिकडच्या काळात घडलेल्या घटना आणि देशभरात वाढलेली सुरक्षा सतर्कता लक्षात घेऊन, मॅडॉक फिल्म्स आणि अमेझॉन एमजीएम स्टुडिओजने हा चित्रपट थिएटरमध्ये प्रदर्शित करण्याऐवजी थेट ओटीटीवर आणण्याचा निर्णय घेतला आहे. त्यांच्या मते, राष्ट्रहित सर्वोपरि असल्याने, राष्ट्राच्या भावनांचा आदर करून हा निर्णय घेण्यात आला आहे.