सुधीर मुनगंटीवार ठरताहेत सभागृहातील जागल्या…
मुंबई दि ११ (एमएमसी न्यूज नेटवर्क): महायुतीच्या सरकारच्या काळात सरकारमध्ये ज्येष्ठ असूनही मंत्रिपद न मिळालेल्या सुधीर मुनगंटीवार यांनी गेल्या आठवड्यापासूनच मुंबईत सुरू असलेल्या विधिमंडळाच्या अधिवेशनात सरकारला धारेवर धरायचं काम सुरू केले असून आपल्याकडे जी वैधानिक आयुधे उपलब्ध आहेत त्या सर्वांचा वापर करून आपण सर्वसामान्यांसाठी सरकारला जाब विचारू असा इशाराच त्यांनी दिला आहे. त्यानंतर ते रोज विविध विषयांवरील चर्चेत भाग घेऊन सरकारला भंडावून सोडत आहेत.
मुनगंटीवार यांना मंत्रिमंडळातून वगळल्या गेल्यानंतर ते चांगलेच नाराज होते. नागपूर मधील अधिवेशनात त्यांची उपस्थिती नगण्यच होती, मात्र तीन तारखेपासून सुरू झालेल्या मुंबईतल्या अर्थसंकल्पीय अधिवेशनात ते पहिल्या दिवसापासून सक्रिय असल्याचे दिसून आले असून वारंवार ते सरकारला, मंत्र्यांना आणि अधिकाऱ्यांना जाब विचारत असतानाचे चित्र दिसत आहे.
प्रश्नोत्तराच्या तासात लक्षवेधी सूचनांच्या चर्चेत आणि इतर वेळेला देखील कधी पॉईंट ऑफ इन्फॉर्मेशन तर कधी पॉईंट ऑफ ऑर्डर च्या माध्यमातून सभागृहामध्ये ते अनेक प्रश्न उपस्थित करीत आहेत. सभागृहाच्या कामकाजाबद्दल देखील त्यांनी आक्षेप नोंदवलेले आहेत. सभागृहाच्या कामकाजात पूर्वी असलेली पद्धत दिसून येत नाही याबद्दल तीव्र नाराजी व्यक्त करत त्यांनी विधिमंडळातील कर्मचाऱ्यांची संख्या वाढवावी असा आग्रह अध्यक्षांकडे धरला होता. मात्र अध्यक्षांनी त्यांना ठोस उत्तर न देता आपली सूचना स्वागतार्ह आहे असे सांगून त्यांची बोळवण केल्याचे दिसून आले.
रस्ते अपघातात मृत्यू मृत्युमुखी पडलेल्या लोकांना नुकसान भरपाई देताना सरकार भेदभाव करत आहे एसटी अपघातासाठी दहा लाख रुपये तर इतर अपघातांमध्ये केवळ पाच लाख रुपये असा सरकारचा दुजाभाव दिसून येतो अशी टीका त्यांनी प्रश्नोत्तराच्या तासात केली. यावर सरकार यासंदर्भामध्ये समन्वय साधून काम करेल असा खुलासा मुख्यमंत्र्यांना करावा लागला होता. लक्षवेधी सूचनेच्या दरम्यान राज्य उत्पादन शुल्क विभागावर टीका करताना दारूतून केवळ पैसेच कमवायचे का, त्यावर हे राज्य चालेल का असा सवाल त्यांनी केला.
दारूची दुकाने बंद करण्यासाठी आवश्यक असणाऱ्या मतांच्या टक्केवारी वरही त्यांनी भाष्य करून सरकारी नियमात चुकीच्या गोष्टी घालून लोकांना भेटीला आढळणाऱ्या अधिकाऱ्यांवर कठोर कारवाई करावी अशी मागणी मुनगंटीवार यांनी केलेली पाहायला मिळाली.
सध्या विधानसभेत विरोधी पक्षनेता अस्तित्वात नाही त्यामुळे मुनगंटीवार हेच जणू या पदाचे काम करत असल्याचे चित्र सध्या पाहायला मिळत आहे.
ML/ML/ SL
11 March 2025
