ज्ञानवापी प्रकरणात मुस्लिम पक्षाला सर्वोच्च न्यायालयाकडून नोटीस
नवी दिल्ली, दि. २२ (एमएमसी न्यूज नेटवर्क) : वाराणसीतील ज्ञानवापी संकुलाशी संबंधित प्रकरणावर आज सर्वोच्च न्यायालयात सुनावणी झाली. हिंदू पक्षाने ज्ञानवापीशी संबंधित सर्व 15 खटले अलाहाबाद उच्च न्यायालयात वर्ग करावेत, जेणेकरून त्यांची एकत्रित सुनावणी होईल, अशी मागणी केली होती. यावर सर्वोच्च न्यायालयाने मुस्लिम पक्षाला नोटीस बजावली आहे. मुस्लिम पक्षाला दोन आठवड्यांत उत्तर देण्यास सांगितले आहे.
ज्ञानवापीशी संबंधित 9 खटले वाराणसी जिल्हा न्यायाधीशांच्या न्यायालयात तर 6 खटले दिवाणी न्यायाधीश वरिष्ठ विभाग, वाराणसी यांच्या न्यायालयात सुरू आहेत. गेल्या महिन्यात याचिकाकर्त्या लक्ष्मी देवी आणि अन्य तीन महिलांनी या संदर्भात सर्वोच्च न्यायालयात याचिका दाखल केली होती. त्यात त्यांनी ज्ञानवापीशी संबंधित काही प्रकरणे दिवाणी न्यायाधीश वरिष्ठ विभाग, जिल्हा न्यायाधीश यांच्या न्यायालयात प्रलंबित असल्याचे म्हटले होते. पुनर्विचार याचिकांसह काही प्रकरणे अलाहाबाद उच्च न्यायालयात प्रलंबित आहेत.
काही पुनर्विलोकन याचिका जिल्हा न्यायाधीशांसमोरही आहेत, तर जिल्हा न्यायाधीशही मूळ खटल्यांवर सुनावणी करत आहेत. अशा स्थितीत परस्परविरोधी आदेश येण्याची शक्यता आहे. त्यामुळे सर्व खटले अलाहाबाद उच्च न्यायालयात वर्ग करण्यात यावेत. उच्च न्यायालयाच्या 3 न्यायमूर्तींच्या खंडपीठाने सर्व प्रकरणांची सुनावणी करून निर्णय द्यावा, अशी मागणीही याचिकेत करण्यात आली होती.
याचिकाकर्त्यांचे म्हणणे आहे की या 15 प्रकरणांमध्ये कायद्याचे महत्त्वाचे प्रश्नही आहेत, ज्यांचा निर्णय मोठ्या न्यायालयानेच द्यावा. या प्रश्नांमध्ये ऐतिहासिक तथ्ये, ASI संबंधित प्रश्न, हिंदू आणि मुस्लीम कायदा आणि संविधानाच्या कलम 300A चा अर्थ यासारख्या प्रश्नांचाही समावेश आहे. त्यामुळे या प्रकरणांची उच्च न्यायालयात सुनावणी झाली पाहिजे.
SL/ML/SL
22 Nov. 2024
