उद्या दुपारी दोन वाजेपर्यंत कडकडीत बंद पाळा-उद्धव ठाकरे
मुंबई, दि. 23 (एमएमसी न्यूज नेटवर्क) : येत्या २४ तारखेला म्हणजेच उद्या महाविकास आघाडीने महाराष्ट्र बंदची घोषणा दिली आहे. या पार्श्वभूमीवर शिवसेना उबाठा गटाचे नेते उद्धव ठाकरे यांनी पत्रकार परिषद घेऊन उद्याच्या बंदबद्दल माहिती दिली. उद्याचा बंद कडकडीत असणार असून दुपारी दोन वाजेपर्यंत बंद पाळण्याचे आवाहन त्यांनी केले. यादरम्यान रेल्वे सेवा आणि बस सेवा बंद ठेवायला हरकत नाही, असे त्यांनी सांगितले. “उद्याचा बंद विकृती विरुद्ध संस्कृती यासाठी आहे.
आपली मुलगी शाळेत सुरक्षित राहिल का? असा प्रश्न पालकांना पडला आहे. आपली मुलगी कार्यालयात सुरक्षित आहे का? असा प्रश्न माता-भगिनींना पडला आहे. याला वाचा फोडण्यासाठी आम्ही बंद पुकारला आहे. आम्ही विकृतीविरोधात बंद पुकारलेला आहे. बंदचे यश – अपयश हे विकृती आणि संस्कृतीचे असणार आहे. आपल्या माता-भगिनींची सर्वांना चिंता आहे, हे सरकारला दाखवून दिले पाहीजे. सणासुदीचे दिवस असल्यामुळे २४ ऑगस्टचा बंद दुपारी २ वाजेपर्यंतच पाळावा, असे आवाहन उद्धव ठाकरे यांनी यावेळी केले.
TR/ML/PGB
23 Aug 2024
