अयोध्येत रामनवमीच्या दिवशी श्रीरामांवर होणार सूर्यकिरणांचा अभिषेक
अयोध्या, दि. १२ (एमएमसी न्यूज नेटवर्क) : अखिल भारतवासियांसाठी यावर्षींची रामनवमी खूप खास असणार आहे.तब्बल ५०० वर्षांनी प्रभू श्रीराम आपल्या जन्मभूमीत विराजमान झाल्यानंतरची पहिल्यांदाच साजरी होणाऱ्या या रामनवमी अयोध्येत एक अद्भुत सेलिब्रेशन होणार आहे. यंदाच्या रामनवमीचं सगळ्यात मोठं आकर्षण असेल श्रीरामांच्या मस्तकी होणारा सूर्य किरणांचा अभिषेक. रामनवमीच्या दिवशी, मध्यान्ही, दुपारी 12 वाजता, साधारणपणे चार मिनिटं रामलल्लाच्या मस्तकावर सूर्यकिरणांचा अभिषेक होणार आहे. श्रीरामांच्या भाळी होणारा हा गोलाकार सूर्याभिषेक 75 एमएम व्यासाचा असेल. या अभिषेकासाठी गेले काही दिवस रुडकीच्या सेंट्रल बिल्डिंग रिसर्च संस्थेचे वैज्ञानिक दिवसरात्र मेहनत घेत होते. मंदिर उभारताना या अभिषेकासाठी बांधकाम तज्ज्ञांनी विशेष रचना केली आहे. या सूर्यकिरणांच्या अभिषेकाचं थेट प्रक्षेपण होणार आहे. तर अयोध्येतल्या भाविकांना हा सोहळा पाहता यावा यासाठी 100 एलईडी स्क्रीन लावले जातील.
देशातील काही मंदिरांमध्ये गाभाऱ्यातील मूर्तीवर उगवतीची किंवा मावळतीची किरणे पडतात. कोल्हापूरच्या अंबाबाईच्या गाभाऱ्यात पश्चिम दरवाज्यातून मावळतीची किरणं देवीला सूर्यकिरणांचा अभिषेक करतात. पण, अयोध्येच्या ही सूर्यकिरणे घुमटातून येणार आहेत. कारण भगवान रामाचा जन्म मध्यान्हाची वेळी झाला होता. यावेळी सूर्य अगदी आपल्या डोक्यावर असतो. त्यामुळे मंदिरात जिथे श्रीराम विराजमान आहेत तिथल्या घुमटावर गवाक्षासारखी रचना करण्यात आली आहे आणि याच गवाक्षातून एका विशेष सिस्टिमच्या माध्यमातून मध्यान्हीची किरणं गाभाऱ्यात येत श्रीरामांवर किरणाभिषेक होईल.
घुमटाच्या गवाक्षातून येणाऱ्या किरणांची दिशा अचूक ठेवण्यासाठी ऑप्टोमेकॅनिकल सिस्टिमचा आधार घेतला गेला आहे. या सिस्टिममध्ये अभिषेकासाठी दोन आरसे, एक पितळेचा पाईप आणि तीन लेन्सेस सगळ्यात महत्त्वाची भूमिका बजावणार आहेत. यातील सगळ्यात मोठी लेन्स मंदिराच्या छतावर बसवली गेली आहे. रामनवमीच्या दिवशी सूर्यकिरणं छतावरच्या रिफ्लेक्टवर पडतील. तिथून ही किरणं पहिल्या आरशावर परावर्तीत केली जातील. आणि मग पितळेच्या पाईपमधल्या पुढच्या दोन लेन्समधून प्रवास करत ही किरणं पोहोचतील थेट गाभाऱ्यात श्रीराम मूर्ती समोर बसवलेल्या दर्पणापर्यंत. हा आरसा श्रीरामांपासून ६० अंशांच्या कोनात ठेवला गेला आहे. जेणेकरुन या किरणांचा अभिषेक थेट रामाच्या मस्तकी होऊ शकेल.
SL/ML/SL
12 April 2024
