प्रेषित मोहम्मद यांची निंदा प्रकरणी विद्यार्थ्यांला मृत्यूदंड
मुंबई, दि. ९ (एमएमसी न्यूज नेटवर्क) : कट्टर मुस्लिम धार्मिक देश असलेल्या पाकिस्तानमध्ये धर्म आणि प्रेषितांबद्दल गैर उद्गार काढणाऱ्या व्यक्तीला कठोरातील कठोर शिक्षा केली जाते. आता पाकिस्तानच्या एका न्यायालयाने 22 वर्षीय विद्यार्थ्याला ईशनिंदेप्रकरणी मृत्यूदंडाची शिक्षा सुनावली आहे. त्याचबरोबर 17 वर्षीय विद्यार्थ्याला जन्मठेपेची शिक्षा सुनावण्यात आली आहे. बीबीसीच्या वृत्तानुसार, विद्यार्थ्यांनी व्हॉट्सॲपवर प्रेषित मुहम्मद यांच्याबद्दल आक्षेपार्ह संदेश पाठवले होते. अहवालात म्हटले आहे की 22 वर्षीय विद्यार्थ्याने असे फोटो-व्हिडिओ बनवले होते ज्यात पैगंबर मोहम्मद आणि त्यांच्या पत्नींबद्दल आक्षेपार्ह शब्द बोलले गेले होते. 17 वर्षीय विद्यार्थ्याने हे फोटो आणि व्हिडिओ शेअर केले होते.
पाकिस्तानातील सर्वाधिक लोकसंख्या असलेल्या पंजाब प्रांताच्या न्यायालयाने हा निर्णय दिला. मुस्लिमांच्या धार्मिक भावना दुखावण्याच्या उद्देशाने निंदनीय फोटो आणि व्हिडिओ बनवून शेअर केल्याबद्दल न्यायालयाने त्याला दोषी ठरवले. पाकिस्तानमध्ये ईशनिंदेसाठी मृत्यूदंडाच्या शिक्षेची तरतूद आहे. काही जणांना बेदम मारहाण करून मारून टाकले जाते.
याआधी देखील घडलेल्या अशाच प्रकरणांमध्ये कठोर शिक्षा सुनावण्यात आल्याची अनेक उदाहरणे आहेत. मार्च 2023 मध्ये, पाकिस्तानमधील दहशतवादविरोधी न्यायालयाने एका व्हॉट्सॲप ग्रुपमध्ये निंदनीय टिप्पण्या पोस्ट केल्याबद्दल एका मुस्लिम व्यक्तीला मृत्यूदंडाची शिक्षा सुनावली होती. न्यायालयाने दोषीला 12 लाख रुपये (1.2 दशलक्ष) दंडही ठोठावला होता. फेब्रुवारी 2023 मध्ये, ईशनिंदेचा आरोप असलेल्या व्यक्तीला पोलिस स्टेशनच्या बाहेर काढून मारण्यात आले. जमावाने पोलिस ठाण्यावर हल्ला केल्यावर पोलिस तेथून पळून गेले. तथापि, नंतर ते अतिरिक्त सैन्यासह परत आले आणि त्यांनी आरोपीचा मृतदेह जाळण्यापासून वाचवला. मोहम्मद वारिसवर कुराणचा अपमान केल्याचा आरोप होता.
डिसेंबर 2021 मध्ये, श्रीलंकन फॅक्टरी मॅनेजरला ईशनिंदा केल्याच्या आरोपावरून जमावाने बेदम मारहाण करत मारून टाकले आणि नंतर जाळून टाकले. प्रियंता कुमारा नावाच्या या व्यक्तीच्या केबिनमध्ये फाटलेले पोस्टर सापडले होते. त्यावर मोहम्मद असे लिहिले होते. कारखान्यात काम करणाऱ्या कामगारांनी हा पैगंबराचा अपमान मानला. एप्रिल 2017 मध्ये मिशाल खानची मर्दान विद्यापीठात त्याच्या सहकाऱ्यांनी बेदम मारहाण करत हत्या केली होती. 2012 मध्ये, बहावलपूरजवळ हिंसक जमावाने एका मनोरुग्ण व्यक्तीला पोलीस ठाण्यातून खेचून मारले होते. त्याचप्रमाणे दादोमध्येही जमावाने पोलिस ठाण्यात घुसून ईशनिंदेचा आरोप असलेल्या एका व्यक्तीला जिवंत जाळले.
SL/KA/SL
9 March 2024
