विमान प्रवास महागणार, जेट इंधनाच्या किमती दुप्पट
मुंबई, दि. १ : मध्य पूर्वेतील सुरू असलेला युद्धामुळे जागतिक स्तरावर कच्च्या तेलाच्या किमतीत झालेल्या वाढीमुळे ATF किमती विक्रमी उच्चांकावर पोहोचल्या आहेत. इतिहासात प्रथमच जेट इंधनाची किंमत प्रति किलोलिटर २ लाख रुपयांच्या पुढे गेली आहे. यामुळे येत्या काही दिवसांत विमान तिकिटे लक्षणीयरीत्या महाग होण्याची भीती निर्माण झाली आहे. यापूर्वी, १ मार्च रोजी किमती ५.७ टक्क्यांनी वाढवण्यात आल्या होत्या. परंतु या ताज्या दरवाढीने मागील सर्व विक्रम मोडीत काढले आहेत.
विमान इंधन किंवा एअर टर्बाइन फ्युएल (ATF) च्या किमतीत वाढ ही १ मार्चच्या किमतीच्या दुप्पट झाली आहे. ATF च्या किमतीतील ही १००% वाढ विमान प्रवाशांवर बोजा ठरू शकते आणि विमान कंपन्या विमान तिकिटांच्या किमती वाढवू शकतात.
विमान कंपन्यांच्या एकूण खर्चापैकी सुमारे ४०% खर्च इंधनावर (ATF) होतो, त्यामुळे जेव्हा इंधन महाग होते, तेव्हा विमान कंपन्यांना हा भार प्रवाशांवर टाकण्याशिवाय पर्याय उरत नाही. जेट इंधनाच्या किमती २.०७ लाख रुपये ओलांडल्यामुळे विमान कंपन्यांचा परिचालन खर्च लक्षणीयरीत्या वाढेल.
दरम्यान, पेट्रोलियम मंत्रालयाच्या म्हणण्यानुसार, देशांतर्गत विमानांतील प्रवाशांवर १०० टक्के दरवाढीऐवजी केवळ २५ टक्के दरवाढीचा परिणाम होईल. मंत्रालयाने यासाठी तरतूद केली आहे. मात्र, चार्टर विमाने आणि नॉन-शेड्यूल्ड फ्लाइट्सना संपूर्ण १०० टक्के दरवाढ भरावी लागेल.
SL/ML/SL
