तारिक रहमान बांगलादेशचे नवे पंतप्रधान
ढाका, दि. १७ : बांगलादेश नॅशनलिस्ट पार्टी अध्यक्ष तारिक रहमान बांगलादेशचे नवे पंतप्रधान झाले आहेत. राष्ट्रपती मोहम्मद शहाबुद्दीन यांनी संसद भवनात तारिक यांना पदाची शपथ दिली. भारताचे लोकसभा अध्यक्ष ओम बिर्ला हे देखील या समारंभात उपस्थित होते.
तारिक रहमान पंतप्रधान होण्याची ही पहिलीच वेळ आहे. आज दुपारी बीएनपीच्या खासदारांनी त्यांना संसदीय पक्षाचे नेते म्हणून निवडले. ते माजी पंतप्रधान खालिदा झिया आणि माजी राष्ट्रपती झियाउर रहमान यांचे पुत्र आहेत. १७ वर्षे लंडनमध्ये राहिल्यानंतर ते दोन महिन्यांपूर्वी बांगलादेशला परतले.
रहमान यांच्या व्यतिरिक्त, २५ कॅबिनेट मंत्री आणि २४ राज्यमंत्र्यांनीही शपथ घेतली. यामध्ये हिंदू मंत्री निताई रॉय चौधरी आणि बौद्ध मंत्री दीपेन दिवान चकमा यांचा समावेश आहे. २५ कॅबिनेट मंत्र्यांपैकी १७ नवीन चेहरे आहेत. सर्व २४ राज्यमंत्री नवीन आहेत.
गेल्या गुरुवारी झालेल्या सार्वत्रिक निवडणुकीत, बांगलादेश नॅशनलिस्ट पार्टी (बीएनपी) ने २९९ पैकी २०९ जागा जिंकल्या, बहुमतासाठी आवश्यक असलेल्या १५० जागा ओलांडल्या. याशिवाय त्यांच्या मित्रपक्षांनी ३ जागा जिंकल्या.
SL/ML/SL
