अखेर वाहतूक विभागाचे पोलिस शिपाई किरण सूर्यवंशी यांचा विविध मान्यवरांनी केला सत्कार
मुंबई, दि २६
ब्रेकअप झाल्यानंतर काळाचौकी येथे भरदिवसा तरुणीवर तिचा प्रियकर चाकूने वार करीत असताना अनेकांनी बघ्याची भूमिका घेतली होती. मात्र जवळच कर्तव्यावर असणारे वाहतूक विभागाचे पोलीस शिपाई किरण सूर्यवंशी हे तिच्या मदतीला धावून आले. त्यांनी तिला आरोपीच्या ताब्यातून कसेबसे सोडवले. रक्ताच्या थारोळ्यातून उचलून जवळच्या रुग्णालयात दाखल केले. मात्र अतिरक्तस्त्रावामुळे तिचा दुर्दैवाने मृत्यू झाला.
सोनू बराय या प्रियकर इसमाने मनीषा यादव या तरुणीवर चाकूने सपासप वार करत होता. ती स्वःताला वाचविण्यासाठी नर्सिंग होममध्ये शिरली. मात्र तेथेही आरोपी तिच्यावर हल्ला करतच होता. यामुळे तेथे येणाऱ्या जाणाऱ्यांची गर्दी जमली होती. मात्र कोणीही तिच्या मदतीला धावून येत नव्हते.
यावेळी भायखळा वाहतूक विभागाचे रायडर पोलीस शिपाई (१७१२८१) किरण सूर्यवंशी जवळच असणाऱ्या मयुरेश इमारती येथे अनधिकृत पार्किंगच्या वाहने उचलण्याच्या कर्तव्यावर होते. त्यांना येथील आस्था नर्सिंग होमच्या केबिनमध्ये एक जण मुलीवर चाकूने सपासप वार करीत असल्याचे समजले. या घटनेचे गांभीर्य ओळखून किरण यांनी तत्काळ घटनास्थळी धाव घेतली. मनीषाला आरोपी सोनू बराय याच्या तावडीतून सोडवून नर्सिंग होमच्या बाहेर काढले. ती फार गंभीर जखमीझाली होती. सूर्यवंशी यांनी क्षणाचाही विलंब न करता तिला लगेच टॅक्सीत घालून राणीबाग येथील डॉ. बाबासाहेब आंबेडकर हॉस्पिटलमध्ये दाखल केले. रुग्णालयात नेताना ‘मुझे बचाओ मुझे हॉस्पिटल लेके चलो’ असे ती सारखे ओरडत होती. सूर्यवंशीही तिला धीर देत होते. मध्य रेल्वेच्या डॉ.बाबासाहेब आंबेडकर हॉस्पिटलमध्ये तिच्यावर उपचार करण्यात आले. नंतर काळाचौकीचे अधिकारी व अंमलदार यांनी पुढील उपचाराकरिता तिला जे जे हॉस्पिटलमध्ये त्वरित हलवले, मात्र तोपर्यंत तिची प्राणज्योत मालवली होती.
पोलीस शिपाई किरण सूर्यवंशी यांनी मनीषा यादवला वाचवण्याचा प्रयत्न केला. यात त्यांचा गणवेश रक्ताने माखून गेला होता. त्यांनी दाखवलेल्या धाडसाबद्दल दक्षिण मुंबई वाहतूक विभागाचे उपायुक्त प्रवीण परदेशी यांनी प्रशस्तिपत्र देऊन सत्कार केला. तर स्थानिक राजकीय पक्ष महाराष्ट्र नवनिर्माण सेनेच्या वतीने संजय नाईक, महेशदादा थोरात यांनी तर शिवसेना उभाठाचे माजी नगरसेवक अनिल कोकिळ यांनी त्यांचा भायखळा वाहतूक चौकीमध्ये येऊन सत्कार केला. यावेळी सर्व राजकीय पक्षाचे पदाधिकारी आणि कार्यकर्ते उपस्थित होते. KK/ML/MS
