काशी विश्वनाथाच्या पुजारी, कर्मचाऱ्यांना राज्य सरकारी सेवकाचा दर्जा
वाराणसी, दि. ८ : उत्तर प्रदेश सरकारने काशी विश्वनाथ मंदिरातील पुजारी आणि कर्मचाऱ्यांना राज्य सरकारी सेवकाचा दर्जा देण्याचा ऐतिहासिक निर्णय घेतला आहे. या निर्णयामुळे मंदिरातील सेवा करणाऱ्या व्यक्तींना आता सरकारी कर्मचाऱ्यांप्रमाणे वेतन, निवृत्तीवेतन, वैद्यकीय सुविधा आणि इतर भत्त्यांचा लाभ मिळणार आहे. मंदिर प्रशासनाच्या बैठकीत हा निर्णय घेण्यात आला असून, यामुळे मंदिरातील कर्मचाऱ्यांचे सामाजिक आणि आर्थिक स्थान अधिक मजबूत होईल.
काशी विश्वनाथ मंदिर हे भारतातील सर्वात पवित्र आणि ऐतिहासिक मंदिरांपैकी एक मानले जाते. 1983 पासून हे मंदिर उत्तर प्रदेश सरकारच्या अधिपत्याखाली आहे, परंतु इतक्या वर्षांनंतरही मंदिरातील पुजारी आणि कर्मचाऱ्यांना सरकारी सेवकाचा दर्जा मिळालेला नव्हता. आता या निर्णयामुळे त्यांना न्याय मिळाला आहे. याअंतर्गत, पुजाऱ्यांचा मासिक पगार सुमारे ₹30,000 वरून ₹90,000 पर्यंत वाढवला जाणार आहे, तसेच इतर कर्मचाऱ्यांनाही त्यांच्या पदानुसार वेतनवाढ आणि सुविधा मिळतील.
या निर्णयासोबतच मंदिर परिसराच्या विकासासाठीही काही महत्त्वाचे निर्णय घेण्यात आले आहेत. मिर्झापूर येथे वैदिक शिक्षण संस्था स्थापन करण्यास मंजुरी देण्यात आली आहे. तसेच काशी विश्वनाथ धाम ते विशालाक्षी मंदिर यामधील थेट मार्ग तयार करण्यासाठी काही इमारती खरेदी करण्याचा प्रस्तावही मंजूर झाला आहे. मंदिर परिसरात सुरक्षा वाढवण्यासाठी आधुनिक कंट्रोल रूम आणि CCTV कॅमेरे बसवण्याची योजना आखण्यात आली आहे.
SL/ML/SL
