बाईक-बोलेरोचा भीषण अपघात ५ जण ठार, ३ गंभीर
नाशिक, दि. ५ (एमएमसी न्यूज नेटवर्क) : दिंडोरी रोडवर भीषण अपघात झाला असून या दुर्घटनेत ५ जणांचा मृत्यू झाला आहे. तर ३ जण गंभीर जखमी झाले असून जखमींना जिल्हा रुग्णालयात उपचारासाठी दाखल करण्यात आले आहे. महाराष्ट्र आरोग्य विज्ञान विद्यापीठाच्या पुढील इंडियन ऑइल पेट्रोल पंपाजवळ मोटर सायकल आणि बोलेरो यांच्यामध्ये हा अपघात झाला. यामध्ये दुचाकी वरील दोन जण तर बोलेरो गाडीतील तीन जणांचा जागीच मृत्यू झाला. मिळालेल्या माहितीनुसार बोलेरो गाडीतून भाविक वणीकडून नाशिककडे येत होते, तर दुचाकी ही नाशिक कडून दिंडोरी रोडवरील पिंपळनारे गावाकडे चालली होती.
टायर फुटल्याने घडला अपघात
दिंडोरी रोडवर ग्लोबल स्कूल जवळ बोलेरोचे टायर फुटून हा भीषण अपघात झाला. वणीहून सप्तशृंगीचे दर्शन घेऊन नाशिकच्या दिशेने येत बोलेरो येत असताना हा अपघात झाला. या अपघातात अनिल बोडके (वय ६०), राहुल बोडके (वय २६), राहणार नाशिक, कुसूमदेवी यादव (वय ४५), अमन यादव (वय १८), मुकेश यादव (वय २५) राहणार बनारस यांचा जागीच मृत्यू झाला असून विकास यादव (वय ३९) रामकिशन यादव (वय ५०) इकबाल रामकिशन यादव (वय २०) राहणार बनारस हे तीन द्राक्ष व्यापारी गंभीर जखमी झाले आहेत.
ML/ML/SL
5 April 2024
