रेल्वे अपघातात एका मेंढपाळासह २२ मेंढ्या, २ जनावरे ठार
बीड, दि. ११ (एमएमसी न्यूज नेटवर्क) : बीड जिल्ह्यातील परळी शहरापासून जवळ असलेल्या मलकापुर शिवारात रेल्वेखाली आल्याने एका मेंढपाळासह २२ मेंढ्या आणि २ जनावरे ठार झाल्याची दुर्दैवी घटना घडली. हा अपघात आज सकाळी १० वाजण्याच्या सुमारास घडला आहे.
परळी शहरातील धनगर गल्ली भागातील मेंढपाळ मधुकर सरवदे आणि मुंजा डोणे रा.उखळी ह.मु.परळी हे दोघे आज रेल्वे पटरीने मेंढ्या चारण्यासाठी गेले असता रविवार ११ ऑगस्ट रोजी सकाळी १० वाजण्याच्या सुमारास परळी-हैद्राबाद रेल्वे पटरीच्या कडेने जात असताना मलकापुर शिवारात अचानक समोरुन आलेल्या मालगाडीने मेंढ्या,दोन जनावरांना चिरडले. दोन्ही बाजुने डोंगर असल्याने बचावासाठी वेळच मिळाला नसल्याने मेंढपाळ मुंजा डोणे हे देखील या दुर्घटनेत सापडुन ठार झाले. या दुर्घटनेत सरवदे यांच्या २२ मेंढ्या आणि २ जनावरे मृत्युमुखी पडले आहेत. ह्या दुर्दैवी घटनेने परिसरात हळहळ व्यक्त होत आहे.
ML/ML/SL
11 Aug 2024
