या राज्यात मेंदू खाणाऱ्या अमिबामुळे १९ जणांचा मृत्यू
केरळ राज्यात एक दुर्मिळ आणि अत्यंत घातक संसर्गजन्य आजाराने थैमान घातले असून, आतापर्यंत १९ जणांचा मृत्यू झाल्याची माहिती समोर आली आहे. ‘नेग्लेरिया फॉवलेरी’ नावाच्या सूक्ष्मजीवामुळे होणारा प्रायमरी अमिबिक मेनिंगोएन्सेफलायटीस (PAM) हा आजार सामान्यतः ‘मेंदू खाणारा अमिबा’ म्हणून ओळखला जातो. या संसर्गामुळे रुग्णाच्या मेंदूवर गंभीर परिणाम होतो आणि बहुतेक वेळा मृत्यू अटळ ठरतो.
या संसर्गाची सुरुवात कोझिकोड आणि मलप्पुरम जिल्ह्यांमध्ये झाली होती, मात्र आता संपूर्ण राज्यभरात रुग्ण आढळत आहेत. आरोग्य विभागाने दिलेल्या माहितीनुसार, या आजाराने बाधित झालेल्या रुग्णांमध्ये तीन महिन्यांच्या बाळापासून ते ९१ वर्षांच्या वृद्धांपर्यंतचा समावेश आहे. आरोग्यमंत्री वीणा जॉर्ज यांनी परिस्थितीची गांभीर्याने दखल घेतली असून, राज्यभरात जलस्रोतांची तपासणी आणि स्वच्छतेसाठी विशेष मोहीम राबवली जात आहे.
नेग्लेरिया फॉवलेरी हा अमिबा सामान्यतः गोड्या पाण्यात आढळतो—तलाव, विहिरी, जलतरण तलाव, गरम पाण्याचे झरे आणि अशा ठिकाणी जिथे पाण्याची देखभाल योग्य प्रकारे होत नाही. हा अमिबा नाकावाटे शरीरात प्रवेश करतो आणि थेट मेंदूपर्यंत पोहोचतो. संसर्ग झाल्यानंतर सुरुवातीला डोकेदुखी, ताप, मळमळ, उलट्या, मान ताठ होणे, फिट येणे, गोंधळ, भास आणि बेशुद्ध होणे अशी लक्षणे दिसून येतात. CDC च्या माहितीनुसार, लक्षणे दिसल्यानंतर १ ते १८ दिवसांत रुग्णाचा मृत्यू होण्याची शक्यता असते.
सध्या केरळ सरकारने तलाव, विहिरी आणि सार्वजनिक जलकुंभांची तपासणी वाढवली असून, जलस्रोत स्वच्छ करण्यासाठी निधी मंजूर केला आहे. आरोग्य विभागाने नागरिकांना गोड्या पाण्यात पोहताना किंवा आंघोळ करताना विशेष काळजी घेण्याचे आवाहन केले आहे. या संसर्गावर सध्या कोणताही प्रभावी उपचार उपलब्ध नसल्यामुळे प्रतिबंधात्मक उपाय आणि जनजागृती हाच एकमेव मार्ग आहे.
ही परिस्थिती केवळ केरळपुरती मर्यादित न राहता इतर राज्यांसाठीही धोक्याची घंटा ठरू शकते. त्यामुळे सार्वजनिक आरोग्य यंत्रणांनी सतर्क राहणे आणि जलस्रोतांची नियमित तपासणी करणे अत्यावश्यक आहे.
