भटक्या कुत्र्यांसाठी प्रसिद्ध गायक दान करणार १० एकर जमिन
नवी दिल्ली, दि. १२ सर्वोच्च न्यायालयाने काही काळापूर्वीच भटक्या कुत्र्यांना शहरांमधून हटवून निवारागृहात पाठवण्याचा मोठा आदेश जारी केला आहे. मात्र, यावर गायक मिका सिंग यांनी सर्वोच्च न्यायालयाला विनंती केली आहे की, भटक्या कुत्र्यांना त्रास होईल असा कोणताही निर्णय घेऊ नये. यासोबतच त्यांनी घोषणा केली आहे की, ते स्वतः या कुत्र्यांसाठी 10 एकर जमीन दान करतील, जिथे कुत्र्यांची योग्य प्रकारे काळजी घेतली जाईल.
रविवारी मिका सिंग यांच्या अधिकृत X अकाउंटवर (पूर्वी ट्विटर) या मोठ्या पावलाची घोषणा करताना लिहिले होते की, ‘मिका सिंग भारताच्या माननीय सर्वोच्च न्यायालयाला नम्र विनंती करतो की, कुत्र्यांच्या कल्याणाला हानी पोहोचवणारे कोणतेही निर्णय टाळावेत.’
पुढे त्यांनी लिहिले, ‘मला हे सांगायचे आहे की माझ्याकडे पुरेशी जमीन आहे आणि मी कुत्र्यांची काळजी घेण्यासाठी आणि त्यांना राहण्यासाठी 10 एकर जमीन देण्यास तयार आहे. माझी फक्त एवढीच विनंती आहे की कुत्र्यांची काळजी घेण्यासाठी योग्य कर्मचारी आणि जबाबदार लोक उपलब्ध करून द्यावेत. मी कुत्र्यांसाठी निवारा (शेल्टर) बनवण्यासाठी आणि त्यांच्या सुरक्षा, आरोग्य आणि चांगल्या जीवनाशी संबंधित सर्व गरजांसाठी माझी जमीन देण्यास तयार आहे.’
अलीकडेच भटक्या कुत्र्यांनी चावा घेतल्याची अनेक प्रकरणे समोर आली आहेत, ज्यावर सर्वोच्च न्यायालयाने आदेश दिला की सर्व भटक्या कुत्र्यांना शहरातून काढून दूरच्या निवारागृहात पाठवले जावे. न्यायालयाने भटक्या कुत्र्यांना अनेक रस्ते अपघातांचे कारण देखील मानले. सर्वोच्च न्यायालयाच्या या आदेशावर देशभरात संताप व्यक्त झाला. अनेकांनी याविरोधात अपील केले, तर अनेकांनी हा निर्णय योग्य असल्याचे म्हटले. अलीकडेच न्यायालयाने एक आदेश जारी करून सांगितले आहे की त्यांनी कुत्र्यांना पूर्णपणे रस्त्यावरून हटवण्याचा कोणताही आदेश दिलेला नाही.
SL/ML/SL
