शिवसेनेच्या सुनावणीला ३० जुलैची नवी तारीख!

“आम्ही इथे रिकामे बसलेलो नाही!” सुप्रीम कोर्टाने सुनावले

नवी दिल्ली दि १७ : शिवसेना पक्ष आणि निवडणूक चिन्हाच्या मालकी हक्काबाबत सुरू असलेल्या प्रदीर्घ कायदेशीर लढाईत सर्वोच्च न्यायालयाने शुक्रवारी, पुढील सुनावणीसाठी ३० जुलै २०२६ ही नवी तारीख निश्चित केली आहे. सरन्यायाधीश सूर्यकांत आणि न्यायमूर्ती जॉयमाल्या बागची यांच्या खंडपीठासमोर या प्रकरणाची सुनावणी झाली. ठाकरे गटाचे वकील देवदत्त कामत यांनी हे प्रकरण लवकरात लवकर निकाली काढण्याची विनंती न्यायालयाला केली होती. मात्र, सुनावणी सुटी संपल्यानंतर जुलै महिन्यापर्यंत पुढे ढकलण्यात आली. यावेळी न्यायालयाने ठाकरे गटाच्या नेत्यांकडून सातत्याने होणाऱ्या वक्तव्यांवर तीव्र आक्षेप घेतला. “आम्ही इथे रिकामे बसलेलो नाही!” असे सुप्रीम कोर्टाने सुनावले.

सुनावणी सुरू होताच सरन्यायाधीशांनी ठाकरे गटाच्या वकिलांना स्पष्ट शब्दांत सुनावले की, “सर्वप्रथम, तुम्ही तुमच्या लोकांना माध्यमांकडे जाऊन ‘सर्वोच्च न्यायालय निर्णय देत नाहीये’ अशी बेजबाबदार विधाने करण्यापासून थांबवा.” एका बाजूला स्वतःच्या सोयीनुसार न्यायालयात तारखा मागून घ्यायच्या आणि दुसऱ्या बाजूला सार्वजनिक व्यासपीठावर किंवा माध्यमांमध्ये जाऊन न्यायालयाच्या विश्वासार्हतेवर प्रश्नचिन्ह उपस्थित करायचे, हा दुटप्पीपणा चालणार नाही, असा सज्जड दम न्यायालयाने दिला.

न्यायालयाने आपल्या दैनंदिन कामकाजाचा दाखला देत पुढे म्हटले की, “आम्ही इथे रोज संध्याकाळी ४ वाजेपर्यंत काम करत असतो. जर कोणाला आम्ही इथे रिकामे बसलेले दिसलो, तर आम्ही त्यांचे म्हणणे समजू शकतो; परंतु अशा प्रकारे न्यायालयाची नाहक प्रतिमा मलिन करणे योग्य नाही.” यावर वकील देवदत्त कामत यांनी बाजू मांडताना स्पष्ट केले की, कायदेतज्ज्ञ या नात्याने आम्ही अशा कोणत्याही राजकीय विधानांचे समर्थन करत नाही, परंतु गेल्या तीन वर्षांपासून हा खटला प्रलंबित असल्याने पक्षकारांमध्ये केवळ चिंतेचे वातावरण आहे.

आम्ही टीका केलेली नाही – शिंदे सेना

या वादात मुख्यमंत्री एकनाथ शिंदे यांच्या गटाच्या वतीने उपस्थित राहिलेले ज्येष्ठ वकील मुकुल रोहतगी यांनी न्यायालयाच्या भूमिकेचे समर्थन केले. “न्यायालयाने दोन्ही बाजूंना अत्यंत संयमाने आणि दयाळूपणे ऐकून घेतले आहे, त्यामुळे कोणत्याही पक्षकाराला न्यायालयाविरुद्ध अशी विधाने करण्याचा अधिकार नाही. आमच्या बाजूने असे कोणतेही वक्तव्य केले गेलेले नाही,” असे रोहतगी यांनी न्यायालयात स्पष्ट केले. निवडणूक आयोगाचा निर्णय आणि सुनील प्रभू यांच्यासह इतर नेत्यांनी दाखल केलेल्या सर्व प्रलंबित याचिकांवर आता ३० जुलै रोजी अंतिम व सविस्तर सुनावणी घेतली जाईल.

महत्त्वाचे

• पुढील सुनावणी: शिवसेना पक्ष आणि चिन्ह वादावरील सर्वोच्च न्यायालयातील पुढील सुनावणी आता ३० जुलै २०२६ रोजी होणार आहे.
• न्यायालयाची तीव्र नाराजी: प्रसारमाध्यमांमध्ये न्यायालयाच्या दिरंगाईवर होणाऱ्या टीकेवरून सर्वोच्च न्यायालयाने उद्धव ठाकरे गटाच्या वकिलांना कडक शब्दांत फटकारले.
• सरन्यायाधीशांची तंबी: “तुम्ही स्वतः न्यायालयात तारखा मागता आणि बाहेर जाऊन कोर्ट निर्णय देत नसल्याची विधाने करता, हे यापुढे सहन केले जाणार नाही,” असा इशारा न्यायालयाने दिला.
• संबंधित याचिका: निवडणूक आयोगाने शिंदे गटाला दिलेले ‘शिवसेना’ नाव व ‘धनुष्यबाण’ चिन्ह आणि आमदार अपात्रतेप्रकरणी विधानसभा अध्यक्षांच्या निर्णयाला दिलेल्या आव्हानावरील याचिकांवर एकत्रित सुनावणी होणार आहे.ML/ML/MS