“बंगालमध्ये नव्या सूर्याचा उदय” – पंतप्रधान

“आपने कमाल कर दिया है, कमल खिला दिया है” म्हणत कार्यकर्त्यांचे केले कौतुक

“४ मई, ममता गई!”; बंगाली वेशभूषेत पंतप्रधान मोदींचे ऐतिहासिक विजयानंतर जल्लोषात स्वागत

नवी दिल्ली दि ४ : पश्चिम बंगालमध्ये पहिल्यांदाच स्पष्ट बहुमत आणि आसाममध्ये विजयाची ‘हॅट्ट्रिक’ साधल्यानंतर, पंतप्रधान नरेंद्र मोदी यांनी सोमवारी संध्याकाळी दिल्लीतील भारतीय जनता पक्षाच्या मुख्यालयात कार्यकर्त्यांना संबोधित केले. विशेष म्हणजे, बंगालमधील विजयाचे औचित्य साधून पंतप्रधान बंगाली धोती आणि कुर्ता परिधान करून कार्यालयात पोहोचले. यावेळी ‘४ मई, ममता गई’ आणि ‘मोदी-मोदी’च्या घोषणांनी संपूर्ण परिसर दणाणून गेला होता.

पंतप्रधान मोदींच्या भाषणाने कार्यकर्त्यांमध्ये नवीन ऊर्जा भरली आहे. “भय नाही तर भविष्य” हा मंत्र देत त्यांनी बंगालच्या नवनिर्माणाचा संकल्प जाहीर केला. हा दिवस भारताच्या महान लोकशाहीवरील विश्वासाचा दिवस असल्याचे त्यांनी अधोरेखित केले.

पंतप्रधानांच्या भाषणातील आणि या सोहळ्यातील प्रमुख वैशिष्ट्ये

“बदला नव्हे, बदल हवा”

पंतप्रधान मोदींनी बंगालमधील विजयाचे वर्णन ‘नव्या सूर्याचा उदय’ असे केले. “आम्हाला कोणाचा बदला घ्यायचा नाही, तर बंगालमध्ये बदल (पोरिबोरतोन) घडवायचा आहे. भीतीचे राजकारण संपवून भविष्याचे राजकारण करायचे आहे,” असे ते म्हणाले. ‘पल्टानो दरकार, चाय बीजेपी सरकार’ (बदल हवा आहे, भाजप सरकार हवे आहे) या थीम साँगच्या धर्तीवर त्यांनी “आपने कमाल कर दिया है, कमल खिला दिया है” म्हणत कार्यकर्त्यांचे कौतुक केले.

जागतिक अस्थिरतेमध्ये भारताची ‘स्थिरता’

पंतप्रधानांनी या निकालांच्या वेळेवर (टायमिंग) विशेष भाष्य केले. ते म्हणाले, “जेव्हा या राज्यांतील जनता मतदान करत होती, तेव्हा जगभरात युद्धाचे सनई-चौघडे वाजत होते. जागतिक अर्थव्यवस्था तणावाखाली होती आणि अनेक ठिकाणी अस्थिरतेचे वातावरण होते. अशा गोंधळाच्या परिस्थितीत भारतीय मतदारांनी ‘स्थिरतेसाठी’ मतदान करून जगाला आपली ताकद दाखवून दिली आहे.”

लोकशाही आणि संविधानाचा विजय

पंतप्रधानांनी स्पष्ट केले की, हा केवळ भाजपचा विजय नसून भारतीय लोकशाही आणि संविधानाचा विजय आहे. त्यांनी निवडणूक आयोग, मतदानाच्या प्रक्रियेत सहभागी असलेले कर्मचारी आणि विशेषतः सुरक्षा दलांचे आभार मानले. “भारतीय लोकशाहीची प्रतिष्ठा राखण्यासाठी तुमचे योगदान इतिहास सदैव लक्षात ठेवेल,” असे गौरवोद्गार त्यांनी काढले.

‘नागरिक देवो भव:’ आणि विकासाचे राजकारण

भाजपचा मूळ मंत्र ‘नागरिक देवो भव:’ असल्याचे सांगत मोदींनी ‘एक भारत, श्रेष्ठ भारत’ आणि ‘पॉलिटिक्स ऑफ परफॉर्मन्स’वर जनतेने विश्वास दाखवल्याचे नमूद केले. अनेक वर्षांच्या तपस्येला आणि कार्यकर्त्यांच्या संघर्षाला आज फळ मिळाले आहे, अशा शब्दांत त्यांनी आपल्या भावना व्यक्त केल्या.

बंगाल आणि आसाममधील ऐतिहासिक कामगिरी

• पश्चिम बंगाल: इतिहासात पहिल्यांदाच भाजपने बंगालमध्ये बहुमताचा आकडा पार केला आहे.
• आसाम: सलग तिसऱ्यांदा विजय मिळवून भाजपने आपली पकड घट्ट केली आहे.
• पुडुचेरी: येथेही एनडीएने यश संपादन केले आहे. ML/ML/MS