अणू चाचण्या आणि अण्वस्त्र निर्मितीत मोलाचे योगदान देणारे डॉ चिदंबरम यांचे निधन

मुंबई, दि. ४ (एमएमसी न्यूज नेटवर्क) :

भारताचे ज्येष्ठ शास्त्रज्ञ डॉ. राजगोपाला चिदंबरम यांचे शनिवारी पहाटे निधन झाले. ते 88 वर्षांचे होते. अणुऊर्जा विभागाच्या अधिकाऱ्याने सांगितले की, राजगोपालांनी मुंबईच्या जसलोक रुग्णालयात पहाटे 3.20 वाजता अखेरचा श्वास घेतला. पंतप्रधान नरेंद्र मोदी यांनी डॉ. राजगोपाल यांच्या निधनावर शोक व्यक्त केला. ते म्हणाले, “डॉ. राजगोपालांनी भारताची वैज्ञानिक आणि मुत्सद्दी शक्ती मजबूत करण्यात महत्त्वाची भूमिका बजावली. ते भारताच्या अणुकार्यक्रमाच्या शिल्पकारांपैकी एक होते. येणाऱ्या पिढ्या त्यांच्या कार्यातून प्रेरणा घेतील.” डॉ. राजगोपाल यांना 1975 मध्ये पद्मश्री आणि 1999 मध्ये पद्मविभूषण पुरस्काराने सन्मानित करण्यात आले. 1990 मध्ये त्यांनी भाभा अणु संशोधन केंद्राच्या संचालकपदाची जबाबदारीही स्वीकारली.

भारत सरकारच्या अणुऊर्जा विभागाने सांगितले की, “त्यांच्या योगदानामुळे भारताची अणुशक्ती म्हणून जगात स्थापना झाली. त्यांना जगातील अनेक विद्यापीठांकडून मानद डॉक्टरेट पदव्या देण्यात आल्या.” अणुऊर्जा विभागाने म्हटले- त्यांच्या निधनाने देश आणि आपल्या वैज्ञानिक समुदायाची कधीही भरून न येणारी हानी आहे. ते विज्ञान आणि तंत्रज्ञानाचे प्रणेते होते, त्यांच्या कार्यांने देशाला आत्मविश्वास आणि अणुशक्ती दिली.”

डॉ. राजगोपालांचा जन्म 1936 मध्ये चेन्नई येथे झाला. त्यांनी चेन्नईच्या प्रेसिडेन्सी कॉलेज आणि इंडियन इन्स्टिट्यूट ऑफ सायन्स, बेंगळुरू येथे शिक्षण घेतले. 1974 च्या अणु चाचणी टीममध्ये डॉ. राजगोपालांनी महत्त्वाची भूमिका बजावली होती. 1998 मध्ये झालेल्या पोखरण अणु चाचणी-2 मध्ये त्यांनी गटाचे नेतृत्व केले. देशातील अण्वस्त्र निर्मितीतही त्यांनी सक्रिय भूमिका बजावली. डॉ. राजगोपाल 1993 मध्ये अणुऊर्जा आयोगाचे अध्यक्षही झाले. ते 2000 पर्यंत या पदावर राहिले, ज्या दरम्यान भारताने 1998 मध्ये दुसरी अणुचाचणी घेतली. ते भारताचे मुख्य वैज्ञानिक सल्लागारही होते.

SL/ML/SL
4 Jan. 2025