चीनचे मुंबईतील वाणिज्यदूत श्री. किन जी यांनी महापौर श्रीमती रितू तावडे यांची घेतली सदिच्छा भेट
मुंबई, दि ४
चीनचे मुंबईतील वाणिज्यदूत श्री. किन जी यांनी मुंबईच्या महापौर श्रीमती रितू तावडे यांची बृहन्मुंबई महानगरपालिका मुख्यालयातील महापौर दालनात आज (दिनांक ४ मार्च २०२६) सदिच्छा भेट घेतली.
महापौरपदी विराजमान झाल्याबद्दल महापौर श्रीमती रितू तावडे यांचे वाणिज्यदूत श्री. किन जी यांनी अभिनंदन केले.
या सदिच्छा भेटीदरम्यान भारत-चीन तसेच मुंबई आणि चीनमधील प्रमुख शहरांदरम्यान द्विपक्षीय सहकार्य वृद्धिंगत करण्याबाबत चर्चा झाली. सांस्कृतिक देवाणघेवाण, व्यापार-उद्योग, शिक्षण, तंत्रज्ञान तसेच शाश्वत विकास या क्षेत्रांमध्ये परस्पर सहकार्याच्या संधींवर दोन्ही मान्यवरांनी सकारात्मक संवाद साधला.
श्री. किन जी यांनी मुंबई महानगरातील पायाभूत सुविधा व विकास कामांचा विशेष उल्लेख केला. या विकास कामांमुळे मुंबई महानगराचा जागतिक स्तर उंचावला आहे, असे त्यांनी नमूद केले.
महापौर श्रीमती रितू तावडे यांनी मुंबई ही आंतरराष्ट्रीय पातळीवरील महत्त्वाची आर्थिक व सांस्कृतिक नगरी असल्याचे नमूद करीत भविष्यातील सहकार्यामुळे दोन्ही देशांतील नागरिकांमध्ये संबंध अधिक दृढ होतील, असा विश्वास व्यक्त केला.
चीन वाणिज्य दूतावासातील अधिकारी श्री. वांग जिनशेंग हे देखील यावेळी उपस्थित होते.KK/ML/MS
